“सावधान! एसीचा अतिवापर ठरू शकतो धोकादायक; डॉक्टरांचा इशारा”

“सावधान! एसीचा अतिवापर ठरू शकतो धोकादायक; डॉक्टरांचा इशारा”

“उन्हापासून बचाव की आजारांना निमंत्रण? एसी वापरताना घ्या काळजी”

सोलापूर :- सोलापुरात यंदाच्या उन्हाळ्यात तापमानाने अक्षरशः कहर केला असून, पारा तब्बल ४४ अंश सेल्सियसपर्यंत पोहोचला आहे. वाढत्या उकाड्यापासून बचाव करण्यासाठी शहरवासीयांचा कल मोठ्या प्रमाणात एसी अर्थात एअर कंडिशनरकडे वाढला आहे. मात्र, एसीचा अतिवापर आरोग्यास गंभीर धोके निर्माण करू शकतो, असा इशारा आरोग्य तज्ज्ञांनी दिला आहे.

तज्ज्ञांच्या मते, सतत एसीमध्ये राहिल्यामुळे त्वचा कोरडी पडणे, डोळ्यांत जळजळ होणे, घसा कोरडा पडणे, नाक वाहणे, शिंका येणे, खोकला वाढणे अशा समस्या निर्माण होऊ शकतात. तसेच सांधेदुखी, स्नायूंमध्ये कडकपणा, पाठदुखी आणि मानदुखी यासारखे त्रासही वाढू शकतात.

धुळीची अॅलर्जी, अस्थमा किंवा इतर श्वसनविकार असलेल्या व्यक्तींना एसीचा अतिवापर विशेषतः धोकादायक ठरू शकतो. शुगर आणि बीपी असलेल्या रुग्णांनाही त्याचा परिणाम जाणवू शकतो. एसीच्या फिल्टरमध्ये धूळ, बुरशी आणि जीवाणू साचल्यास ते हवेत मिसळून थेट श्वासावाटे शरीरात जातात. त्यामुळे दम्याची लक्षणे वाढण्याची आणि फुफ्फुसांच्या संसर्गाची शक्यता वाढते.

• तापमानातील अचानक बदल घातक •

तीव्र उन्हातून अचानक एसीच्या थंड वातावरणात जाणे किंवा एसीमधून लगेच बाहेरील उष्णतेत जाणे शरीरावर ताण निर्माण करते. यामुळे डोकेदुखी, चक्कर येणे, थकवा आणि रोगप्रतिकारक शक्ती कमी होण्याचे प्रकार वाढू शकतात.

• डॉक्टरांचा महत्वाचा सल्ला •

फुफ्फुस विकार तज्ज्ञ डॉ. सुयश पाटील यांनी सांगितले की,
धुळीची अॅलर्जी किंवा अस्थमा असलेल्या लोकांनी एसीचे तापमान कमीत कमी २८ अंश सेल्सियसपर्यंत ठेवावे. औषधे वेळेवर घ्यावीत आणि अतिथंड पाणी पिणे टाळावे. तसेच तीव्र उन्हातून थेट एसीमध्ये जाणे किंवा थंड वातावरणातून अचानक उन्हात जाणे धोकादायक ठरू शकते.

• नागरिकांनी कोणती काळजी घ्यावी? •

* एसीचे तापमान २४ ते २६ अंश सेल्सियस दरम्यान ठेवावे

* एसीचे फिल्टर वेळोवेळी स्वच्छ करावेत

* खोलीतील खिडक्या-दरवाजे काही वेळ उघडे ठेवून नैसर्गिक हवा येऊ द्यावी

* शरीरात पाण्याची कमतरता होऊ देऊ नये

* लहान मुले, वृद्ध आणि श्वसनविकार असलेल्या व्यक्तींनी विशेष काळजी घ्यावी

*“थंडावा हवा, पण आरोग्य धोक्यात नको”*

उन्हाळ्याच्या वाढत्या तीव्रतेमुळे एसी हा गरजेचा भाग बनला असला तरी त्याचा अतिरेक टाळणे आवश्यक असल्याचे डॉक्टरांनी स्पष्ट केले आहे. योग्य तापमान, स्वच्छता आणि काळजी घेतल्यास एसीचा वापर सुरक्षित राहू शकतो, असेही त्यांनी सांगितले.