अक्कलकोटकरांच्या पाण्यासाठी मिलन कल्याणशेट्टींचा पुढाकार; दररोज ७० ते ८० हजार लिटर पाण्याचा टँकरद्वारे पुरवठा

अक्कलकोटकरांच्या पाण्यासाठी मिलन कल्याणशेट्टींचा पुढाकार; दररोज ७० ते ८० हजार लिटर पाण्याचा टँकरद्वारे पुरवठा

पाणीपुरवठा पूर्ववत होईपर्यंत टँकरची व्यवस्था सुरू राहणार; शहरातील १२ प्रभागांमध्ये मागणीनुसार नियोजन

अक्कलकोट : अक्कलकोट शहरातील नियमित पाणीपुरवठा पूर्ववत होण्यासाठी सुरू असलेल्या कामांमुळे काही भागांत पाणीपुरवठ्यास विलंब होत आहे. या पार्श्वभूमीवर नागरिकांना पाणीटंचाईचा अधिक त्रास होऊ नये, यासाठी नगराध्यक्ष मिलन कल्याणशेट्टी यांनी पुढाकार घेत टँकरद्वारे पाणीपुरवठ्याची व्यवस्था सुरू केली आहे.

आमदार सचिन कल्याणशेट्टी यांच्या सूचनेनुसार ही व्यवस्था करण्यात येत असून, शहरातील विविध भागांतील नागरिकांच्या मागणीनुसार टँकरचे नियोजन केले जात आहे. त्यामुळे नियमित पाणीपुरवठ्यात अडथळा निर्माण झालेल्या काळात नागरिकांना पर्यायी पाण्याची सुविधा उपलब्ध होत आहे.

अक्कलकोट शहरातील बारा प्रभागांमध्ये स्थानिक लोकप्रतिनिधी आणि नागरिकांकडून प्राप्त होणाऱ्या मागणीनुसार टँकर पाठविण्याचे नियोजन करण्यात आले आहे. दररोज सुमारे १२ ते १३ टँकर पाणीपुरवठा करत असून, एका टँकरची क्षमता सुमारे ६ हजार लिटर आहे.

त्यामुळे शहरातील नागरिकांना दररोज अंदाजे ७० ते ८० हजार लिटर पाणी टँकरच्या माध्यमातून उपलब्ध करून दिले जात आहे. पाणीपुरवठ्याच्या अडचणीच्या काळात ही व्यवस्था नागरिकांसाठी तात्पुरता आधार ठरत आहे.

• कुरनूर धरणातील जलउपसा यंत्रणेचे काम सुरू •

अक्कलकोट शहराचा पाणीपुरवठा भविष्यात अधिक सुरळीत आणि विनाअडथळा करण्यासाठी कुरनूर धरणातील जलउपसा यंत्रणेसाठी वाढीव क्षमतेची पाइपलाइन टाकण्याचे काम सुरू आहे. त्याचबरोबर जलशुद्धीकरण केंद्रातील प्रलंबित कामे पूर्ण करून वाढीव यंत्रणा कार्यान्वित करण्यासाठीही प्रयत्न सुरू आहेत.

सध्या सुरू असलेल्या या कामांमुळे नियमित पाणीपुरवठ्याच्या वेळापत्रकावर परिणाम होत असून काही भागांमध्ये पाणी मिळण्यास विलंब होत आहे. ही बाब लक्षात घेऊन कामे पूर्ण होईपर्यंत नागरिकांची गैरसोय कमी करण्यासाठी टँकरचा पर्याय उपलब्ध करून देण्यात आला आहे.

शहरातील पाणीपुरवठा यंत्रणेची आवश्यक कामे पूर्ण होऊन नियमित पाणीपुरवठा पूर्ववत होईपर्यंत टँकरद्वारे पाणीपुरवठा सुरू ठेवण्याचे नियोजन करण्यात आले आहे. नागरिकांकडून येणाऱ्या मागणीनुसार संबंधित भागात पाणी पोहोचविण्याचा प्रयत्न केला जात आहे.

दरम्यान, पाणीपुरवठ्याची ही तात्पुरती व्यवस्था नागरिकांची गैरसोय कमी करण्यासाठी करण्यात आली असून, उपलब्ध पाण्याचा जपून आणि काटकसरीने वापर करण्याचे आवाहन करण्यात आले आहे.

नियमित पाणीपुरवठा पूर्ववत करण्यासाठी सुरू असलेल्या कामांना वेग देतानाच, तोपर्यंत नागरिकांना टँकरच्या माध्यमातून पाणी उपलब्ध करून देण्याच्या मिलन कल्याणशेट्टी यांच्या पुढाकारामुळे अक्कलकोटकरांना दिलासा मिळाला आहे.