पंढरपूर नगरपरिषदचा राज्यात तृतीय क्रमांक; “माझी वसुंधरा अभियान”त पर्यावरण संवर्धनाचा गौरव
पंढरपूर नगरपरिषदचा राज्यात तृतीय क्रमांक; “माझी वसुंधरा अभियान”त पर्यावरण संवर्धनाचा गौरव
मुंबई (प्रतिनिधी):- महाराष्ट्र राज्य शासनच्या पर्यावरण व वातावरणीय बदल विभागाच्या वतीने आयोजित करण्यात आलेल्या “माझी वसुंधरा अभियान” राज्यस्तरीय पुरस्कार सोहळ्यात 50 हजार ते 1 लाख लोकसंख्या गटात पंढरपूर नगरपरिषदेस राज्यात तृतीय क्रमांक प्राप्त झाला आहे. मुंबई येथे अत्यंत दिमाखदार वातावरणात हा गौरव सोहळा पार पडला.
हा पुरस्कार केवळ सन्मानच नसून स्वच्छता, हरित क्षेत्र वाढ, पर्यावरणपूरक उपक्रमांची अंमलबजावणी, नागरिकांचा सक्रिय सहभाग आणि शाश्वत विकासासाठी राबविलेल्या सातत्यपूर्ण प्रयत्नांची अधिकृत पावती असल्याचे मानले जात आहे. पंढरपूर शहराने पर्यावरण रक्षणासाठी उचललेली प्रत्येक पायरी आता राज्यासाठी प्रेरणादायी ठरत आहे.
या गौरव सोहळ्यास महामहिम राज्यपाल आचार्य देवव्रत, उपमुख्यमंत्री सुनेत्रा अजित पवार, विधानसभा अध्यक्ष राहुल नार्वेकर, पर्यावरण मंत्री पंकजा मुंडे तसेच मुख्य सचिव राजेश अग्रवाल यांची प्रमुख उपस्थिती लाभली. मान्यवरांच्या हस्ते पंढरपूर नगरपरिषदेचा सन्मान करण्यात आला.
पंढरपूर नगरपरिषदेच्या वतीने नगराध्यक्षा डॉ. सौ. प्रणिताताई भगीरथ भालके, उपनगराध्यक्ष श्री. महादेवजी धोत्रे, मुख्याधिकारी श्री. महेश रोकडे यांच्यासह विविध विभागांचे प्रशासकीय अधिकारी व मान्यवरांनी हा सन्मान स्वीकारला.
*पर्यावरणपूरक उपक्रमांची दखल*
“माझी वसुंधरा अभियान” अंतर्गत शहरात खालील महत्त्वपूर्ण उपक्रम प्रभावीपणे राबविण्यात आले-
* शहर स्वच्छता आणि कचरा व्यवस्थापन सुधारणा
* वृक्षारोपण व हरित क्षेत्र वाढ
* प्लास्टिकमुक्ती अभियान
* जलसंवर्धन व ऊर्जा बचत उपक्रम
* नागरिक व स्वयंसेवी संस्थांचा सक्रिय सहभाग
या सर्व घटकांच्या प्रभावी अंमलबजावणीमुळे पंढरपूर नगरपरिषदेला राज्यस्तरीय व्यासपीठावर मानाचा तिसरा क्रमांक मिळवता आला.
*शहरासाठी अभिमानाचा क्षण*
हा पुरस्कार पंढरपूर शहरासाठी अभिमानाचा क्षण ठरला असून, प्रशासन व नागरिकांच्या संयुक्त प्रयत्नांचे फलित असल्याची भावना नगराध्यक्षा डॉ. भालके यांनी व्यक्त केली. पुढील काळात पर्यावरण संवर्धनासाठी अधिक व्यापक आणि नाविन्यपूर्ण उपक्रम राबविण्याचा निर्धारही त्यांनी व्यक्त केला.
पर्यावरण संरक्षण आणि शाश्वत विकासाच्या दिशेने पंढरपूर नगरपरिषदेची ही यशस्वी वाटचाल राज्यातील इतर स्थानिक स्वराज्य संस्थांसाठी निश्चितच प्रेरणादायी ठरणार आहे.
