नवनियुक्त पोलीस महासंचालक सदानंद दाते यांची मुख्यमंत्र्यांशी सदिच्छा भेट; देवेंद्र फडणवीसांकडून शुभेच्छा
नवनियुक्त पोलीस महासंचालक सदानंद दाते यांची मुख्यमंत्र्यांशी सदिच्छा भेट; देवेंद्र फडणवीसांकडून शुभेच्छा
मुंबई (प्रतिनिधी):- महाराष्ट्राचे नवनियुक्त पोलीस महासंचालक (DGP) सदानंद दाते यांनी आज मुंबई येथील मुख्यमंत्री निवासस्थान ‘वर्षा’ येथे मुख्यमंत्री देवेंद्र फडणवीस यांची सदिच्छा भेट घेतली. या भेटीदरम्यान मुख्यमंत्री फडणवीस यांनी दाते यांचे महाराष्ट्र पोलीस दलाच्या सर्वोच्च पदावर नियुक्ती झाल्याबद्दल अभिनंदन केले तसेच त्यांच्या पुढील कार्यकाळासाठी शुभेच्छा दिल्या.
राज्यातील कायदा व सुव्यवस्था, गुन्हेगारी नियंत्रण, सायबर गुन्हे, तसेच आधुनिक तंत्रज्ञानाच्या मदतीने पोलीस प्रशासन अधिक सक्षम करण्याबाबत मुख्यमंत्री आणि नवनियुक्त डीजीपी यांच्यात चर्चा झाल्याची माहिती सूत्रांनी दिली. राज्यातील पोलीस दल अधिक लोकाभिमुख, पारदर्शक आणि कार्यक्षम करण्याच्या दृष्टीने अपेक्षा व्यक्त करण्यात आल्या.
दीर्घ प्रशासकीय अनुभव असलेले सदानंद दाते यांची डीजीपीपदी नियुक्ती झाल्याने पोलीस दलात सकारात्मक वातावरण निर्माण झाले आहे. आगामी काळात राज्यातील अंतर्गत सुरक्षा, महिला सुरक्षेसह नागरिकांच्या सुरक्षिततेस प्राधान्य देत प्रभावी कार्यपद्धती राबविली जाईल, अशी अपेक्षा व्यक्त केली जात आहे.
ही भेट औपचारिक असली तरी राज्याच्या प्रशासनिक दृष्टिकोनातून ती महत्त्वाची मानली जात असून, नवनियुक्त पोलीस महासंचालकांच्या कार्यकाळाकडे सर्वांचे लक्ष लागले आहे.
