टँकरमुक्त अक्कलकोटकडे वाटचाल; नगर परिषद घेणार महत्त्वाचा निर्णय
अक्कलकोट (प्रतिनिधी):- शहराच्या विकासासाठी महत्त्वपूर्ण ठरणारी अक्कलकोट नगर परिषदेची पहिली विशेष सभा आज, सोमवारी सकाळी साडेअकरा वाजता पंडित दीनदयाल उपाध्यय सभागृहात पार पडणार आहे. नूतन नगराध्यक्ष मिलन कल्याणशेट्टी यांच्या अध्यक्षतेखाली होणाऱ्या या सभेत शहराच्या पाणीप्रश्नावर मोठा निर्णय होण्याची शक्यता व्यक्त केली जात आहे.
नगर परिषदेच्या इतिहासात प्रथमच World Bank पुरस्कृत निधी अक्कलकोट शहराला मिळणार असल्याने प्रशासन आणि नागरिकांच्या अपेक्षा उंचावल्या आहेत. या निधीतून प्रस्तावित नव्या पाणीपुरवठा योजनेवर सविस्तर चर्चा होऊन प्रकल्पाला तत्वतः मंजुरी मिळण्याची शक्यता वर्तवली जात आहे.
अक्कलकोट शहर गेल्या अनेक वर्षांपासून तीव्र पाणीटंचाईचा सामना करत आहे. विशेषतः उन्हाळ्यात टँकरवर अवलंबून राहण्याची वेळ नागरिकांवर येते. पाण्यासाठी लांबच लांब रांगा, अपुरा पुरवठा आणि वाढती लोकसंख्या यामुळे हा प्रश्न अधिकच गंभीर बनला आहे.
याच पार्श्वभूमीवर वर्ल्ड बँक निधीतून राबवली जाणारी नवीन पाणीपुरवठा योजना शहरासाठी दिलासा देणारी ठरू शकते. या प्रकल्पामुळे शहराला शाश्वत व नियमित पाणीपुरवठा होण्याची आशा व्यक्त केली जात आहे.
*सभेत कोणते मुद्दे राहणार केंद्रस्थानी?*
* वर्ल्ड बँक निधीअंतर्गत पाणीपुरवठा योजनेचा आराखडा
* प्रकल्पाचा खर्च, कालावधी व अंमलबजावणी प्रक्रिया
* भविष्यातील वाढत्या लोकसंख्येचा विचार करून पाणी नियोजन
* शहर टँकरमुक्त करण्याचा रोडमॅप
*शहरासाठी ‘गेम-चेंजर’ ठरण्याची शक्यता*
प्रस्तावित योजना मंजूर झाल्यास अक्कलकोट शहराच्या विकासाला नवी दिशा मिळणार असल्याचे मानले जाते. नियमित व स्वच्छ पाणीपुरवठा झाल्यास नागरिकांच्या दैनंदिन जीवनात मोठा बदल होणार असून आरोग्य व स्वच्छतेच्या दृष्टीनेही हा प्रकल्प महत्त्वाचा ठरणार आहे.
आजच्या विशेष सभेकडे संपूर्ण शहराचे लक्ष लागले असून, पाणीप्रश्नावर ठोस निर्णय होतो का याकडे नागरिक उत्सुकतेने पाहत आहेत.
