धाराशिव जिल्हा परिषदेचे कार्यकारी अभियंता सुनील कटकधोंड यांना मातृशोक

धाराशिव जिल्हा परिषदेचे कार्यकारी अभियंता सुनील कटकधोंड यांना मातृशोक

माजी मुख्याध्यापिका जनाबाई कटकधोंड यांचे निधन; गुरुवारी सोलापुरात अंत्यसंस्कार

सोलापूर : धाराशिव जिल्हा परिषद ग्रामीण पाणीपुरवठा विभागाचे कार्यकारी अभियंता सुनील कटकधोंड यांच्या मातोश्री तथा जिल्हा परिषद प्राथमिक शाळा, नान्नज येथील माजी मुख्याध्यापिका जनाबाई सुब्राव कटकधोंड यांचे बुधवार, दि. १६ सप्टेंबर २०२६ रोजी अल्पशा आजाराने दुःखद निधन झाले. त्यांच्या निधनामुळे कटकधोंड कुटुंबीयांसह नातेवाईक, मित्रपरिवार आणि परिचितांमध्ये शोककळा पसरली आहे.

जनाबाई कटकधोंड यांनी शिक्षण क्षेत्रात कार्यरत असताना विद्यार्थ्यांच्या शैक्षणिक जडणघडणीत महत्त्वपूर्ण योगदान दिले. नान्नज येथील जिल्हा परिषद प्राथमिक शाळेच्या मुख्याध्यापिका म्हणून त्यांनी बजावलेली सेवा उल्लेखनीय मानली जाते. त्यांच्या निधनाने कुटुंबीयांनी आपला आधारवड गमावल्याची भावना व्यक्त होत आहे.

त्यांची अंत्ययात्रा गुरुवार, दि. १७ सप्टेंबर २०२६ रोजी सकाळी १० वाजता सोलापूर येथील समृद्धी ग्रीन अपार्टमेंट, निराळे वस्ती, उमा नगरी येथील त्यांच्या राहत्या घरापासून निघणार आहे. त्यांच्यावर चौत्रा-पुणा नाका, सोलापूर येथील स्मशानभूमीत अंत्यसंस्कार करण्यात येणार आहेत.

त्यांच्या पश्चात दोन मुले, एक मुलगी, जावई, सुना आणि नातवंडे असा मोठा परिवार आहे. त्यांच्या निधनाबद्दल शैक्षणिक, प्रशासकीय तसेच सामाजिक क्षेत्रातून हळहळ व्यक्त होत आहे.