१० हजार मर्यादा असताना ३५ हजार आत कसे? एसीबी कारवाईनंतर मंत्रालयात कुजबुज
मुंबई : राज्याच्या प्रशासनाचे केंद्र मानल्या जाणाऱ्या मंत्रालयात काल घडलेल्या लाच प्रकरणानंतर आता सुरक्षा व्यवस्थेवर गंभीर प्रश्न उपस्थित होत आहेत. अँटी करप्शन ब्युरो (एसीबी) ने रचलेल्या सापळ्यात एका कर्मचाऱ्याला ३५ हजार रुपये लाच स्वीकारताना रंगेहात पकडण्यात आले. या कारवाईनंतर मंत्रालय परिसरात विविध चर्चांना उधाण आले आहे.
मंत्रालयात रोख रक्कम नेण्याबाबत साधारण १० हजार रुपयांची मर्यादा असल्याचे सर्वसाधारणपणे सांगितले जाते. मात्र संबंधित व्यक्ती ३५ हजार रुपये घेऊन आत कसा पोहोचला, याबाबत आता नागरिक आणि कर्मचारी वर्गातून प्रश्न उपस्थित होत आहेत. मंत्रालयाच्या प्रवेशद्वारांवर कडक सुरक्षा तपासणी असतानाही एवढी रक्कम आत कशी आली, याबाबत शंका व्यक्त केली जात आहे.
घटनेनंतर काहींनी सुरक्षा यंत्रणेच्या कार्यक्षमतेवर प्रश्नचिन्ह उपस्थित केले असून, प्रवेश तपासणी प्रक्रिया काटेकोरपणे राबवली जाते का, याची चौकशी करण्याची मागणी होत आहे. विशेषतः लाच प्रकरण उघड झाल्यानंतर “चेकिंग झाली नव्हती का?” असा सवाल नागरिकांतून विचारला जात आहे.
दरम्यान, या कारवाईमुळे मंत्रालयातील वातावरण काही काळ तणावपूर्ण झाले होते. एसीबी अधिकाऱ्यांनी आवश्यक पंचनामा व तपास प्रक्रिया पूर्ण करून संबंधित कर्मचाऱ्याला ताब्यात घेतले. पुढील चौकशी सुरू असून, प्रकरणातील इतर बाबींचाही तपास केला जाणार असल्याची माहिती सूत्रांनी दिली.
या घटनेनंतर मंत्रालयातील सुरक्षा, रोख रकमेवरील नियंत्रण आणि अंतर्गत यंत्रणेची कार्यपद्धती यावर नव्याने चर्चा सुरू झाली आहे. भविष्यात अशा प्रकारांना आळा बसावा यासाठी अधिक कडक उपाययोजना करण्याची गरज व्यक्त होत आहे.
