जंगम यांचा सन्मान सोहळा; नवे सीईओ कुशल जैन उपस्थितीत निरोप समारंभ पार पडला

जंगम यांचा सन्मान सोहळा; नवे सीईओ कुशल जैन उपस्थितीत निरोप समारंभ पार पडला

कार्यकाळाची सांगता सन्मानाने; जंगम दाम्पत्याचा जिल्हा परिषदेत गौरव

सोलापूर (प्रतिनिधी):- सोलापूर जिल्हा परिषदेत माजी मुख्य कार्यकारी अधिकारी कुलदीप जंगम यांचा आज भावपूर्ण निरोप समारंभ पार पडला. या प्रसंगी जंगम यांचा सपत्निक सत्कार करण्यात आला. जिल्हा परिषद अध्यक्ष दिलीप वैद्य यांच्या हस्ते हा सत्कार सोहळा संपन्न झाला.

निरोप समारंभाला नवनियुक्त मुख्य कार्यकारी अधिकारी कुशल जैन, उपाध्यक्ष इंद्रजीत पवार, अतिरिक्त मुख्य कार्यकारी अधिकारी स्मिता पाटील, उपमुख्य कार्यकारी अधिकारी भुजबळ साहेब तसेच अर्थ विभागाच्या वाकडे यांच्यासह विविध विभागांचे अधिकारी व कर्मचारी मोठ्या संख्येने उपस्थित होते.

कार्यक्रमादरम्यान जंगम दाम्पत्याचा शाल, श्रीफळ व स्मृतिचिन्ह देऊन सन्मान करण्यात आला. उपस्थितांनी त्यांच्या कार्यकाळातील कामगिरीचा गौरव करत भविष्यातील वाटचालीस शुभेच्छा दिल्या.

जिल्हा परिषदेत कार्यरत असताना कुलदीप जंगम यांनी विविध विकासकामे, प्रशासनातील पारदर्शकता आणि नियोजनबद्ध कामकाज यावर भर दिला. त्यांच्या नेतृत्वामुळे अनेक प्रकल्पांना गती मिळाली, अशी भावना यावेळी व्यक्त करण्यात आली.

या समारंभात नवे सीईओ कुशल जैन यांची उपस्थिती विशेष ठरली. त्यांनीही जंगम यांच्या कार्याचे कौतुक करत पुढील कार्यकाळात विकासकामांना अधिक गती देण्याचा निर्धार व्यक्त केला.

निरोप समारंभात भावनिक वातावरण निर्माण झाले होते. अधिकारी-कर्मचाऱ्यांनी जंगम यांच्यासोबतच्या आठवणींना उजाळा देत त्यांना शुभेच्छा दिल्या.

एक कार्यक्षम अधिकारी म्हणून ओळख निर्माण केलेल्या जंगम यांना जिल्हा परिषदेकडून सन्मानपूर्वक निरोप देण्यात आला.