हयातीचा दाखला सादर करणे झाले सोपे; निवृत्तीवेतनधारकांसाठी विविध पर्याय उपलब्ध
जीवनप्रमाण पोर्टल, मोबाईल ॲपसह बँक व इंडिया पोस्ट पेमेंट्स बँकेची सुविधा; जिल्हा कोषागार अधिकारी डॉ. वैभव राऊत यांचे आवाहन
हयातीचा दाखला सादर करणे झाले सोपे; निवृत्तीवेतनधारकांसाठी विविध पर्याय उपलब्ध
जीवनप्रमाण पोर्टल, मोबाईल ॲपसह बँक व इंडिया पोस्ट पेमेंट्स बँकेची सुविधा; जिल्हा कोषागार अधिकारी डॉ. वैभव राऊत यांचे आवाहन
सोलापूर, दि. ३० (जिमाका) : जिल्हा कोषागार कार्यालय, सोलापूर अंतर्गत निवृत्तीवेतन व कुटुंब निवृत्तीवेतनधारकांनी सन २०२६-२७ या वर्षासाठी हयातीचा दाखला सादर करावा, असे आवाहन जिल्हा कोषागार अधिकारी डॉ. वैभव राऊत यांनी केले आहे. निवृत्तीवेतनधारकांना हा दाखला सादर करण्यासाठी प्रत्यक्ष बँकेत जाण्याबरोबरच ऑनलाइन व डिजिटल पद्धतीचे विविध पर्याय उपलब्ध करून देण्यात आले आहेत.
निवृत्तीवेतनधारक व कुटुंब निवृत्तीवेतनधारकांना खालीलपैकी कोणत्याही एका पद्धतीने हयातीचा दाखला सादर करता येणार आहे.
१. बँकेत प्रत्यक्ष जाऊन : ज्या बँकेच्या शाखेत निवृत्तीवेतन जमा होते, त्या शाखेत जाऊन बँक अधिकाऱ्यांच्या समक्ष हयातीच्या दाखल्याच्या यादीतील आपल्या नावासमोर स्वाक्षरी करावी.
२. जीवनप्रमाण संकेतस्थळावरून : https://jeevanpramaan.gov.in या संकेतस्थळावर जाऊन ऑनलाइन पद्धतीने हयातीचा दाखला सादर करता येईल.
३. प्रमाणपत्राद्वारे : हयातीच्या प्रमाणपत्रावर बँक अधिकारी अथवा राजपत्रित अधिकाऱ्यांच्या समक्ष स्वाक्षरी करून ते प्रमाणपत्र जिल्हा कोषागार कार्यालयात सादर करता येईल.
४. परदेशात वास्तव्यास असलेल्या निवृत्तीवेतनधारकांसाठी : संबंधित देशातील भारतीय राजदूतावासामार्फत हयातीचा दाखला जिल्हा कोषागार कार्यालयात सादर करता येईल.
५. इंडिया पोस्ट पेमेंट्स बँकेमार्फत : भारतीय डाक विभागाच्या इंडिया पोस्ट पेमेंट्स बँकेच्या (आयपीपीबी) माध्यमातून डिजिटल हयातीचा दाखला ऑनलाइन सादर करण्याची सशुल्क सुविधा उपलब्ध आहे.
६. मोबाईल ॲपद्वारे : अँड्रॉइड स्मार्टफोनवर जीवनप्रमाण ॲप्लिकेशन डाउनलोड करून ऑनलाइन पद्धतीने हयातीचा दाखला सादर करता येईल.
निवृत्तीवेतनधारक व कुटुंब निवृत्तीवेतनधारकांनी आपल्या सोयीनुसार वरीलपैकी कोणत्याही एका पद्धतीचा अवलंब करून सन २०२६-२७ या वर्षासाठी हयातीचा दाखला सादर करावा, असे आवाहन जिल्हा कोषागार कार्यालयाच्या वतीने करण्यात आले आहे.
अधिक माहितीसाठी जिल्हा कोषागार कार्यालयाच्या solapur.pension@gmail.com या ई-मेलवर अथवा ०२१७-२७३१०३६ या दूरध्वनी क्रमांकावर संपर्क साधावा.
