गणवेशाच्या गुणवत्तेपासून इंग्रजी शिक्षणापर्यंत; कुशल जैन यांनी घेतला प्राथमिक शिक्षण विभागाचा आढावा

गणवेशाच्या गुणवत्तेपासून इंग्रजी शिक्षणापर्यंत; कुशल जैन यांनी घेतला प्राथमिक शिक्षण विभागाचा आढावा

‘D’मधून ‘A’कडे शाळांचा प्रवास; गुणवत्तेसोबत विद्यार्थ्यांच्या सुरक्षिततेवरही भर

सोलापूर : जिल्हा परिषद शाळांमधील शैक्षणिक गुणवत्ता, विद्यार्थ्यांची सुरक्षितता आणि शाळांच्या भौतिक सुविधांमध्ये सातत्याने सुधारणा करण्यावर भर देण्याचे निर्देश जिल्हा परिषदेचे मुख्य कार्यकारी अधिकारी कुशल जैन यांनी दिले. प्राथमिक शिक्षण विभागाच्या आढावा बैठकीत त्यांनी शाळानिहाय प्रगतीचा सविस्तर आढावा घेत अधिकारी व केंद्रप्रमुखांना विविध सूचना केल्या.

जिल्हा परिषद सोलापूरच्या प्राथमिक शिक्षण विभागाची आढावा बैठक मुख्य कार्यकारी अधिकारी कुशल जैन यांच्या अध्यक्षतेखाली पार पडली. बैठकीस प्राथमिक शिक्षणाधिकारी विशाल मुळे, जिल्ह्यातील सर्व शिक्षण विस्तार अधिकारी आणि केंद्रप्रमुख उपस्थित होते.

जिल्ह्यातील सर्व जिल्हा परिषद शाळांमध्ये विद्यार्थ्यांना गणवेश वाटप करण्यात आले आहे. मात्र केवळ गणवेश वाटप झाले आहे की नाही, एवढ्यावर न थांबता प्रत्येक शाळेत प्रत्यक्ष तपासणी करून सर्व पात्र विद्यार्थ्यांना गणवेश मिळाला आहे की नाही, याची खात्री करण्याचे निर्देश कुशल जैन यांनी दिले.

वितरित करण्यात आलेल्या गणवेशाची गुणवत्ता तपासण्याची जबाबदारीही संबंधित अधिकारी, शिक्षण विस्तार अधिकारी आणि केंद्रप्रमुखांनी गांभीर्याने पार पाडावी. विद्यार्थ्यांना मिळालेल्या गणवेशाची प्रत्यक्ष पाहणी करून त्याची गुणवत्ता समाधानकारक असल्याची खात्री करावी, असे त्यांनी स्पष्ट केले.

‘आदर्श शाळा’ उपक्रमांतर्गत प्रत्येक शाळेचा शाळानिहाय आढावा घेण्यावर बैठकीत विशेष भर देण्यात आला. प्रत्येक शाळेचे A, B, C आणि D श्रेणीनुसार वर्गीकरण करण्यात येत असून, D श्रेणीतील शाळांना C, C श्रेणीतील शाळांना B आणि B श्रेणीतील शाळांना A श्रेणीत आणण्यासाठी नियोजनबद्ध पद्धतीने काम करण्याचे निर्देश देण्यात आले.

शाळांमध्ये उपलब्ध असलेल्या पायाभूत सुविधा, शैक्षणिक गुणवत्ता आणि विविध शैक्षणिक उपक्रमांच्या आधारे शाळांची प्रगती तपासून आवश्यक त्या सुधारणा करण्यात याव्यात, असे कुशल जैन यांनी सांगितले.

“प्रत्येक शाळेची गुणवत्ता सातत्याने उंचावत नेऊन जिल्ह्यातील जास्तीत जास्त शाळा A श्रेणीत आणणे हे आपले सामूहिक उद्दिष्ट असले पाहिजे,” असे त्यांनी स्पष्ट केले.

जिल्ह्यात PM SHRI योजनेंतर्गत 39 शाळा कार्यान्वित असल्याची माहिती बैठकीत सादर करण्यात आली. या शाळांना केंद्रप्रमुख व संबंधित पर्यवेक्षीय यंत्रणेने नियमित भेटी द्याव्यात, शाळांची प्रत्यक्ष पाहणी करावी आणि त्याबाबतचा सविस्तर अहवाल सादर करावा, अशा सक्त सूचना मुख्य कार्यकारी अधिकारी कुशल जैन यांनी दिल्या.

बैठकीत UDISE Plus पोर्टलवरील माहितीची अचूकता आणि अद्ययावत नोंदी यांचाही आढावा घेण्यात आला. प्रत्येक शाळेची माहिती वेळोवेळी अद्ययावत करून त्यामध्ये कोणत्याही प्रकारची त्रुटी राहणार नाही, याची दक्षता घेण्याच्या सूचना संबंधित अधिकाऱ्यांना देण्यात आल्या.

दक्षिण सोलापूरचे गटविकास अधिकारी मनोज राऊत यांनी तालुक्यात जिल्हा परिषद शाळांमध्ये सुरू असलेल्या इंग्रजी शिक्षणाच्या पायलट प्रकल्पाची माहिती बैठकीत दिली.

हा उपक्रम विद्यार्थ्यांच्या दृष्टीने महत्त्वपूर्ण असून, त्याचे परिणाम आणि अनुभव तपासल्यानंतर पुढील टप्प्यात तो संपूर्ण सोलापूर जिल्ह्यात राबविण्याचे नियोजन करण्यात येणार असल्याचे मुख्य कार्यकारी अधिकारी कुशल जैन यांनी सांगितले.

विद्यार्थ्यांचे इंग्रजी भाषेचे आकलन वाढविणे, संभाषण कौशल्य विकसित करणे आणि त्यांच्यामध्ये इंग्रजी भाषेबाबत आत्मविश्वास निर्माण करणे, या उद्देशाने पायलट प्रकल्पाची प्रभावी अंमलबजावणी करण्याच्या सूचना त्यांनी दिल्या.

या प्रकल्पातून मिळणारे अनुभव, परिणाम आणि प्रभावी शैक्षणिक पद्धती इतर तालुक्यांमध्येही राबविण्याचे नियोजन करण्यात येणार असल्याचे त्यांनी स्पष्ट केले.

शाळांची गुणवत्ता सुधारण्यासाठी केवळ शासनाच्या योजना पुरेशा नसून त्यांची प्रभावी अंमलबजावणी आवश्यक आहे. त्यामुळे शिक्षण विभागातील सर्व अधिकारी, शिक्षण विस्तार अधिकारी आणि केंद्रप्रमुखांनी शाळांना नियमित भेटी देऊन प्रत्यक्ष परिस्थितीचा आढावा घ्यावा आणि आवश्यक त्या सुधारणा तातडीने करण्यासाठी पाठपुरावा करावा, असे निर्देश बैठकीत देण्यात आले.

या आढावा बैठकीत प्राथमिक शिक्षणाधिकारी विशाल मुळे, दक्षिण सोलापूरचे गटविकास अधिकारी मनोज राऊत, जिल्ह्यातील सर्व शिक्षण विस्तार अधिकारी आणि केंद्रप्रमुख उपस्थित होते.

विद्यार्थ्यांना दर्जेदार शिक्षण, सुरक्षित वातावरण आणि आवश्यक भौतिक सुविधा उपलब्ध करून देत जिल्हा परिषद शाळांचा शैक्षणिक दर्जा उंचावण्याचा निर्धार या बैठकीतून अधोरेखित झाला.