दरवाजा उघडताच नोटांचे ढीग! ACB छाप्यात उपजिल्हाधिकाऱ्याची काळी कमाई उघड
हैदराबाद :- सरकारी पदाचा गैरवापर करून कोट्यवधींची संपत्ती गोळा करणाऱ्या अधिकाऱ्यांचे वास्तव पुन्हा एकदा समोर आले आहे. तेलंगणातील उपजिल्हाधिकारी वेंकट रेड्डी यांच्या घरावर टाकण्यात आलेल्या लाचलुचपत प्रतिबंधक विभागाच्या (ACB) छाप्याने महसूल प्रशासनात एकच खळबळ उडवली आहे. छाप्यादरम्यान सापडलेले नोटांचे ढीग, आलिशान मालमत्ता आणि मौल्यवान दागिने पाहून तपास अधिकाऱ्यांनाही क्षणभर विश्वास बसला नाही.
बुधवारी पहाटे एसीबीच्या विशेष पथकाने हनुमाकोंडा येथील उपजिल्हाधिकारी वेंकट रेड्डी यांच्यासह त्यांच्या नातेवाईकांच्या एकूण ८ ठिकाणांवर एकाचवेळी छापे टाकले. या कारवाईत हैदराबादमधील पॉश रॉकी टाऊन कॉलनीतील आलिशान निवासस्थानाचाही समावेश होता.
छाप्यादरम्यान समोर आलेल्या प्राथमिक माहितीनुसार, रेड्डी यांच्याकडे ८ कोटी ३० लाख रुपयांहून अधिक बेहिशेबी मालमत्ता आढळून आली आहे.
ACB अधिकाऱ्यांनी जप्त केलेल्या मालमत्तेमध्ये,
* ३० लाख रुपये रोख
* ६ कोटी रुपये किमतीचा आलिशान विला आणि फार्महाऊस
* मोठ्या प्रमाणात सोन्याचे दागिने व मौल्यवान वस्तू
यांचा समावेश आहे. तपास सुरू असून, हा आकडा आणखी वाढण्याची शक्यता व्यक्त केली जात आहे.
तपासात समोर आलेल्या माहितीनुसार, वेंकट रेड्डी यांनी २००८ सालापासून अवैध संपत्ती जमा करण्यास सुरुवात केली होती, असा संशय व्यक्त केला जात आहे.
विशेषतः २०१६–१७ मध्ये राष्ट्रीय महामार्ग प्रकल्पासाठी शेतकऱ्यांना देण्यात येणाऱ्या मोबदल्यात अपहार केल्याचा गंभीर आरोप त्यांच्यावर आहे.
रेड्डी यांच्यावर याआधीही लाचखोरीचे आरोप झाले होते. जिल्हा शिक्षण अधिकारी असताना १ लाख रुपयांची लाच मागितल्याप्रकरणी ६ डिसेंबर रोजी त्यांना अटक करण्यात आली होती. त्यानंतर त्यांना सेवेतून बडतर्फ करण्यात आले होते.
या कारवाईमुळे पुन्हा एकदा प्रश्न उपस्थित झाला आहे की,
* सामान्य कर्मचाऱ्याचा पगार एवढी संपत्ती कशी उभी करतो?
* अजून किती अधिकारी जनतेच्या पैशावर मौजमजा करत आहेत?
ACB कडून पुढील तपास सुरू असून, येत्या काळात आणखी धक्कादायक खुलासे होण्याची शक्यता नाकारता येत नाही.
