भ्रष्टाचाराविरोधात सोलापूर ACB चे जनजागृती अभियान; २६ ऑक्टोबरपासून दक्षता सप्ताह

भ्रष्टाचाराविरोधात सोलापूर ACB चे जनजागृती अभियान; २६ ऑक्टोबरपासून दक्षता सप्ताह

जिल्ह्यातील सर्व तालुक्यांत विविध कार्यक्रमांचे आयोजन; लाच मागणाऱ्या लोकसेवकांविरोधात तक्रार करण्याचे आवाहन

सोलापूर : शासकीय कामासाठी लाचेची मागणी, भ्रष्टाचार आणि प्रशासकीय गैरप्रकारांना आळा घालण्यासाठी लाचलुचपत प्रतिबंधक विभाग, सोलापूर घटकाच्या वतीने जिल्हाभर जनजागृती मोहीम राबविण्यात येणार आहे. महाराष्ट्र शासनाच्या सामान्य प्रशासन विभागाच्या निर्देशानुसार २६ ऑक्टोबर ते १ नोव्हेंबर २०२६ या कालावधीत ‘दक्षता जनजागृती सप्ताह २०२६’ साजरा करण्यात येणार असून, जिल्ह्यातील सर्व तालुक्यांमध्ये विविध प्रबोधनात्मक कार्यक्रमांचे आयोजन केले जाणार आहे.

भ्रष्टाचारमुक्त समाजाच्या निर्मितीसाठी नागरिकांमध्ये जागरूकता निर्माण करणे, प्रशासनात पारदर्शकता वाढविणे आणि लाचखोरीविरोधात तक्रार करण्यासाठी नागरिकांना प्रोत्साहित करणे, हा या सप्ताहाचा प्रमुख उद्देश आहे. या उपक्रमाच्या माध्यमातून भ्रष्टाचाराविरोधात जनसामान्यांचा सहभाग वाढविण्यावर भर दिला जाणार आहे.

दक्षता जनजागृती सप्ताहानिमित्त शासकीय व निमशासकीय कार्यालये, शैक्षणिक संस्था आणि महाविद्यालयांमध्ये विविध जनजागृतीपर कार्यक्रम आयोजित करण्यात येणार आहेत. ग्रामीण भागातही व्याख्याने, कार्यशाळा आणि अन्य प्रबोधनात्मक उपक्रमांच्या माध्यमातून भ्रष्टाचाराचे दुष्परिणाम, प्रामाणिक प्रशासनाचे महत्त्व आणि नागरिकांचे अधिकार याबाबत माहिती दिली जाणार आहे.

समाजमाध्यमे, व्हॉट्सॲप संदेश आणि ई-मेलच्या माध्यमातून भ्रष्टाचारविरोधी संदेश नागरिकांपर्यंत पोहोचविण्यात येणार आहेत. या सप्ताहादरम्यान लाचलुचपत प्रतिबंधक विभागाचे कार्य, लाचेची मागणी झाल्यास तक्रार नोंदविण्याची प्रक्रिया आणि भ्रष्टाचार प्रतिबंधक कायद्यातील महत्त्वाच्या तरतुदी याविषयीही नागरिकांना मार्गदर्शन केले जाणार आहे.

• लाच मागितल्यास तक्रार करा; भ्रष्टाचार सहन करू नका! •

शासकीय कामकाजासाठी कोणत्याही लोकसेवकाने लाचेची मागणी केल्यास नागरिकांनी घाबरून न जाता लाचलुचपत प्रतिबंधक विभागाशी संपर्क साधून तक्रार करावी, असे आवाहन विभागाने केले आहे. भ्रष्टाचाराविरोधात नागरिकांनी जागरूक राहून प्रामाणिक आणि पारदर्शक प्रशासनाच्या निर्मितीसाठी सक्रिय सहभाग नोंदविणे आवश्यक असल्याचेही विभागाने स्पष्ट केले आहे.

लाचखोरीविरोधात तक्रार करण्याची योग्य प्रक्रिया नागरिकांना समजल्यास भ्रष्टाचाराच्या घटनांविरोधात कायदेशीर मार्गाने पुढे येण्यास मदत होऊ शकते. त्यामुळे दक्षता जनजागृती सप्ताह केवळ औपचारिक कार्यक्रम न राहता नागरिकांमध्ये भ्रष्टाचाराविरोधात ठोस जागरूकता निर्माण करणारा उपक्रम ठरावा, यासाठी प्रयत्न करण्यात येणार आहेत.

• सोलापूर ACB कार्यालयाचा संपर्क •

लाच मागणाऱ्या लोकसेवकांविरोधात तक्रार किंवा भ्रष्टाचारासंबंधी माहिती देण्यासाठी नागरिक खालील संपर्क क्रमांकांवर संपर्क साधू शकतात.

१. लाचलुचपत प्रतिबंधक विभाग, सोलापूर घटक

– पत्ता : छत्रपती रंगभवन हॉलच्या पाठीमागे, रंगभवन चौक, सोलापूर – ४१३००३.
– दूरध्वनी : ०२१७-२३१२६६८
– व्हॉट्सॲप : ९४०४००१०६४
– ई-मेल : dyspacbsolapur@mahapolice.gov.in

२. लाचलुचपत प्रतिबंधक विभाग, पुणे परिक्षेत्र

– पत्ता : सी बॅरेक, सेंट्रल बिल्डिंग, पुणे.
– दूरध्वनी : ०२०-२६१२२१३४
– व्हॉट्सॲप : ९४०३७८१०६४
– ई-मेल : spacbpune@mahapolice.gov.in

३. लाचलुचपत प्रतिबंधक विभाग, मुंबई मुख्यालय

– पत्ता : सर पोचखानवाला मार्ग, वरळी, मुंबई – ४०००३०.
– दूरध्वनी : ०२२-२४९२१२१२
– व्हॉट्सॲप : ९९३०९९७७००
– ई-मेल : acbwebmail@mahapolice.gov.in

टोल-फ्री हेल्पलाइन : १०६४

नागरिकांच्या सहभागातून भ्रष्टाचाराला आळा घालण्याचे आवाहन

भ्रष्टाचाराचे निर्मूलन करण्यासाठी जनजागृती, पारदर्शकता आणि नागरिकांचा सक्रिय सहभाग ही काळाची गरज आहे. शासकीय कामकाजात लाच मागितली जात असल्यास संबंधित विभागाला माहिती देऊन कायदेशीर प्रक्रियेला सहकार्य करावे, असे आवाहन लाचलुचपत प्रतिबंधक विभागाच्या सोलापूर घटकाच्या वतीने करण्यात आले आहे.

दक्षता जनजागृती सप्ताहाच्या कार्यक्रमांना व्यापक प्रसिद्धी देऊन भ्रष्टाचारविरोधी संदेश सर्वसामान्य नागरिकांपर्यंत पोहोचविण्यासाठी माध्यमांनी सहकार्य करावे, अशी विनंतीही पोलीस उपअधीक्षक प्रशांत चौगुले यांनी २४ ऑक्टोबर २०२६ रोजी जारी केलेल्या प्रसिद्धिपत्रकाद्वारे केली आहे.