दोनदा सापळा रचला, तरी लाच स्वीकारली नाही; मग पोलीस हवालदारावर एसीबीची कारवाई का?

दोनदा सापळा रचला, तरी लाच स्वीकारली नाही; मग पोलीस हवालदारावर एसीबीची कारवाई का?

मुलाच्या गुन्ह्यात मदतीचे आश्वासन देऊन लाच मागितल्याचा आरोप; भ्रष्टाचार प्रतिबंधक कायद्यान्वये गुन्हा दाखल

सोलापूर : मुलाविरुद्ध दाखल असलेल्या गुन्ह्याच्या तपासात मदत करण्याचे आश्वासन देत शेतकरी तक्रारदाराकडे सुरुवातीला एक लाख रुपयांची मागणी, त्यानंतर २० हजार रुपये आणि तडजोडीनंतर १० हजार रुपयांची लाच मागितल्याचा प्रकार लाचलुचपत प्रतिबंधक विभागाच्या कारवाईत समोर आला आहे. या प्रकरणी वैराग पोलीस ठाण्यात कार्यरत पोलीस हवालदार संदेश कृष्णदेव पवार यांना २८ ऑक्टोबर रोजी ताब्यात घेण्यात आले. विशेष म्हणजे, तक्रारदाराकडून लाचेची रक्कम स्वीकारण्यासाठी दोन वेळा सापळा रचण्यात आला; मात्र संशय आल्याने त्यांनी पैसे स्वीकारले नाहीत.

लाचलुचपत प्रतिबंधक विभाग, सोलापूर कार्यालयाने दिलेल्या माहितीनुसार, ३९ वर्षीय शेतकरी तक्रारदाराने २८ सप्टेंबर २०२६ रोजी विभागाशी संपर्क साधून तक्रार नोंदवली. त्यांच्या मुलाविरुद्ध दाखल गुन्ह्याच्या तपासात मदत करण्याचे सांगून वैराग पोलीस ठाण्यातील पोलीस हवालदार संदेश पवार यांनी एक लाख रुपयांची मागणी केल्याचा आरोप तक्रारीत करण्यात आला.

एवढी मोठी रक्कम देणे शक्य नसल्याचे तक्रारदाराने सांगितल्यानंतर २० हजार रुपयांची मागणी करण्यात आली. त्यानंतर तक्रारदाराशी झालेल्या तडजोडीतून १० हजार रुपये देण्याचे ठरल्याची माहिती लाचलुचपत प्रतिबंधक विभागाच्या प्रसिद्धिपत्रकात देण्यात आली आहे.

तक्रारीची दखल घेत लाचलुचपत प्रतिबंधक विभागाने २८ सप्टेंबर रोजी दुपारी १.४० ते ३.३७ या वेळेत वैराग पोलीस ठाणे, सोलापूर ग्रामीण येथे पडताळणी केली. या पडताळणीदरम्यान सुरुवातीला २० हजार रुपये मागितल्यानंतर तडजोडीअंती १० हजार रुपयांची लाच मागितल्याचे निष्पन्न झाल्याचे विभागाने नमूद केले आहे.

पोलीस हवालदार संदेश पवार यांच्यावर २८ सप्टेंबर आणि ९ ऑक्टोबर २०२६ रोजी वैराग पोलीस ठाणे येथे सापळा रचण्यात आला. मात्र, तक्रारदार आणि पंच यांच्याबाबत संशय आल्याने त्यांनी लाचेची रक्कम स्वीकारली नाही. त्यामुळे प्रत्यक्ष लाच स्वीकारण्याची घटना घडली नसली, तरी लाच मागणीच्या तक्रारीवरून विभागाने पुढील कायदेशीर कारवाई केली.

या प्रकरणी वैराग पोलीस ठाणे, सोलापूर ग्रामीण येथे गुन्हा रजिस्टर क्रमांक ४२२/२०२६ अन्वये भ्रष्टाचार प्रतिबंधक अधिनियम, १९८८ च्या कलम ७ नुसार गुन्हा दाखल करण्यात आला आहे. २८ ऑक्टोबर २०२६ रोजी दुपारी २ वाजता पोलीस हवालदार संदेश पवार यांना ताब्यात घेण्यात आल्याचे प्रसिद्धिपत्रकात नमूद आहे.

या कारवाईचे नेतृत्व लाचलुचपत प्रतिबंधक विभाग, सोलापूरचे पोलीस उपअधीक्षक प्रशांत चौगुले यांनी केले. पुणे परिक्षेत्राचे पोलीस अधीक्षक शिरीष सरदेशपांडे आणि अपर पोलीस अधीक्षक अजित पाटील यांच्या मार्गदर्शनाखाली पथकाने ही कारवाई केली.

शासकीय कामासाठी किंवा कोणत्याही कारणाने लोकसेवकाने लाचेची मागणी केल्यास नागरिकांनी लाचलुचपत प्रतिबंधक विभागाशी संपर्क साधावा, असे आवाहन विभागातर्फे करण्यात आले आहे.

तक्रारीसाठी संपर्क :

– लाचलुचपत प्रतिबंधक विभाग, सोलापूर : ०२१७-२३१२६६८
– टोल फ्री क्रमांक : १०६४
– व्हॉट्सॲप : ९४०४००१०६४
– ई-मेल : dyspacbsolapur@mahapolice.gov.in