गुटखा माफियांवर आता ‘मकोका’ची कात्री? कायद्यात बदल करणार सरकार – मुख्यमंत्री फडणवीसांचा विधानसभेत महत्त्वपूर्ण खुलासा
गुटखा माफियांवर आता ‘मकोका’ची कात्री? कायद्यात बदल करणार सरकार – मुख्यमंत्री फडणवीसांचा विधानसभेत महत्त्वपूर्ण खुलासा
नागपूर (प्रतिनिधी):- राज्यात बंदी असूनही गुप्तपणे आणि मोठ्या प्रमाणावर सुरू असलेल्या गुटखा विक्रीवर आता अधिक कठोर कारवाई करण्याचा शासनाचा मानस आहे. गुटखा व्यापार करणाऱ्यांवर महाराष्ट्र संघटित गुन्हेगारी नियंत्रण कायदा (मकोका) लागू करण्याचा प्रस्ताव विधि व न्याय विभागाने तपासला होता. मात्र सध्याच्या कायद्यातील तरतुदीनुसार “हार्म आणि हर्ट” हे दोन्ही घटक स्पष्ट नसल्यामुळे मकोका लागू करता येत नव्हता, अशी माहिती मुख्यमंत्री देवेंद्र फडणवीस यांनी विधानसभेत दिली.
मुख्यमंत्री फडणवीस म्हणाले की, राज्यातील वाढत्या गुटखा व्यवसायामुळे आरोग्यावर गंभीर परिणाम होत असून, यामागे मोठे आर्थिक व्यवहार, गट आणि नेटवर्क कार्यरत असल्याचे तपासातून स्पष्ट झाले आहे. त्यामुळे कायद्यात आवश्यक बदल करून गुटखा विक्रेत्यांवरही ‘मकोका’ लागू करता येईल, अशी तरतूद करण्यात येणार असल्याची घोषणा त्यांनी सभागृहात केली.
मुख्यमंत्री फडणवीस यांनी सांगितले की, राज्यात गुटखा विक्री, साठा आणि वहनावर संपूर्ण बंदी असून, त्याविरोधात पोलीस विभागाने मोठ्या प्रमाणावर कारवाई केली आहे. विविध जिल्ह्यांमध्ये शेकडो गुन्हे नोंदविण्यात आले आहेत.
100 मीटरच्या परिसरात गुटखा किंवा तंबाखूजन्य पदार्थांची विक्री आढळल्यास त्या परिसरातील टपऱ्यांवर आणि दुकानांवर संयुक्त कारवाईचे आदेश पोलिसांना देण्यात आले आहेत. ही मोहिम स्थानिक स्वराज्य संस्थांच्या समन्वयाने राबविण्यात येणार असल्याचेही त्यांनी स्पष्ट केले.
मुंबईत गुणवत्तापूर्ण पुनर्वसन केंद्रांची कमतरता असल्याची कबुली देत फडणवीस म्हणाले की, ड्रग्सच्या आहारी गेलेल्या व्यक्तींचे पुनर्वसन हा शासनाचा महत्त्वाचा हेतू असून, त्यासाठी आवश्यक पावले उचलली जातील.
गुटखा माफियांवर कठोर कारवाईसाठी कायद्यात बदल करणार असल्याचे संकेत देत मुख्यमंत्री फडणवीस यांनी स्पष्ट केले की, राज्यातील नागरिकांचे आरोग्य सुरक्षित ठेवण्यासाठी सरकार ‘शून्य सहनशीलते’च्या भूमिकेतून कारवाई करत राहील.
