जिल्हा बँकेच्या निवडणुकीत शहाजी पवारांची शेतकरीहिताची भूमिका; बिनविरोध निवडणुकीसाठी पुढाकार!

जिल्हा बँकेच्या निवडणुकीत शहाजी पवारांची शेतकरीहिताची भूमिका; बिनविरोध निवडणुकीसाठी पुढाकार!

दुष्काळाच्या पार्श्वभूमीवर लाखोंचा निवडणूक खर्च टाळण्याचे आवाहन; सहकार क्षेत्रात पारदर्शकता आणि शेतकऱ्यांच्या प्रश्नांना न्याय देण्याचा निर्धार.

सोलापूर : सोलापूर जिल्हा मध्यवर्ती सहकारी बँकेच्या निवडणुकीत भारतीय जनता पक्षाचे प्रदेश कार्यकारिणी सदस्य शहाजी पवार यांनी उमेदवारी अर्ज दाखल करून निवडणुकीच्या मैदानात प्रवेश केला आहे. मात्र, ही निवडणूक केवळ पद मिळविण्यासाठी नसून सहकार क्षेत्रात पारदर्शकता निर्माण करणे, जिल्ह्याचा सर्वांगीण विकास साधणे आणि शेतकऱ्यांच्या प्रश्नांना न्याय देणे हा आपला मुख्य उद्देश असल्याचे त्यांनी स्पष्ट केले आहे. विशेष म्हणजे, जिल्ह्यातील दुष्काळी परिस्थिती लक्षात घेता शेतकऱ्यांच्या बँकेचा लाखो रुपयांचा निवडणूक खर्च वाचावा, यासाठी निवडणूक बिनविरोध करण्याचा पुढाकारही त्यांनी घेतला आहे.

शहाजी पवार यांनी नागरी सहकारी बँका व नागरी सहकारी पतसंस्था मतदारसंघातून निवडणूक निर्णय अधिकारी मुकुंद पवार यांच्याकडे आपला उमेदवारी अर्ज सादर केला. यावेळी जिल्हा परिषद उपाध्यक्ष इंद्रजीत पवार ,महाराष्ट्र राज्य सहकारी बँकेचे माजी संचालक अविनाश महागावकर, सोलापूर जिल्हा सहकारी पतसंस्था फेडरेशनचे अध्यक्ष दिलीप पतंगे,संभाजी दडे (भाजप उत्तर तालुकाध्यक्ष), विनायक सुतार (भाजप ओबीसी मोर्चाचे जिल्हाध्यक्ष), श्रीशैल बनशेट्टी, शिलरत्न गायकवाड यांच्यासह विविध क्षेत्रांतील मान्यवर उपस्थित होते.

जिल्हा बँक ही शेतकरी आणि ग्रामीण अर्थव्यवस्थेचा महत्त्वाचा आधार आहे. त्यामुळे बँकेच्या माध्यमातून शेतकऱ्यांच्या अडचणी सोडविण्यासाठी ठोस निर्णय घेतले जाणे आवश्यक आहे. शेतकऱ्यांना न्याय मिळावा, त्यांच्या आर्थिक समस्या मार्गी लागाव्यात आणि सहकार क्षेत्राचा कारभार अधिक पारदर्शक व्हावा, या अपेक्षेने आपण निवडणुकीत सहभागी झाल्याचे शहाजी पवार यांच्या समर्थकांनी स्पष्ट केले. शेतकऱ्यांचे हित जपणे आणि त्यांच्या उज्ज्वल भविष्यासाठी प्रयत्न करणे, हेच आपले प्रमुख ध्येय असल्याची भूमिका त्यांनी मांडली.

सध्या जिल्ह्यात दुष्काळी परिस्थिती असून शेतकरी आर्थिक संकटाचा सामना करीत आहेत. अशा परिस्थितीत शेतकऱ्यांच्या मालकीच्या जिल्हा बँकेच्या निवडणुकीवर लाखो रुपये खर्च करण्याऐवजी सर्वांनी सामंजस्याची भूमिका घेऊन निवडणूक बिनविरोध करावी, असे आवाहन शहाजी पवार यांनी केले आहे. निवडणुकीसाठी खर्च होणारा निधी शेतकरीहिताच्या कामांसाठी वापरता आल्यास त्याचा अधिक चांगला उपयोग होईल, असे त्यांचे मत आहे.

न्यायालयाच्या आदेशानुसार निवडणूक प्रक्रिया सुरू असली, तरी सर्व संबंधित उमेदवार, सहकारी संस्था आणि राजकीय पक्षांनी सकारात्मक भूमिका घेतल्यास निवडणूक बिनविरोध होऊ शकते. यासाठी आपण स्वतः पुढाकार घेऊन प्रयत्न करणार असल्याचेही त्यांनी सांगितले.

उमेदवारी अर्ज दाखल केल्यानंतर शहाजी पवार यांनी भाजपच्या विचारधारेवर आधारित पॅनलमधून निवडणूक लढविण्याची इच्छा व्यक्त केली. पक्षाचे वरिष्ठ पदाधिकारी आणि पॅनल आगामी काळात जो निर्णय घेतील, तो आपल्याला मान्य असेल. पक्षाच्या निर्णयाला आपले पूर्ण समर्थन राहील, अशी भूमिका त्यांनी स्पष्ट केली.

सोलापूर जिल्हा मध्यवर्ती सहकारी बँकेच्या निवडणुकीकडे संपूर्ण जिल्ह्याचे लक्ष लागले आहे. शेतकऱ्यांचे हित, सहकार क्षेत्रातील पारदर्शकता आणि जिल्ह्याचा विकास या मुद्द्यांवर निवडणूक बिनविरोध करण्यासाठी शहाजी पवार यांनी पुढाकार घेतल्याने त्यांच्या भूमिकेला विशेष महत्त्व प्राप्त झाले आहे. आता त्यांच्या आवाहनाला अन्य उमेदवार, सहकारी संस्था आणि विविध राजकीय पक्ष कितपत प्रतिसाद देतात, तसेच बिनविरोध निवडणुकीसाठी कोणती भूमिका घेतात, हे पाहणे महत्त्वाचे ठरणार आहे.