एनटीपीसीकडून एन. एम. वाडिया रुग्णालयाच्या पायाभूत सुविधांना बळ; ₹7.64 कोटींच्या CSR प्रकल्पाला मंजुरी
आयपीडी ब्लॉक A, B व अनेक्स इमारतींचे नूतनीकरण; सोलापूरसह ग्रामीण भागातील रुग्णांना मिळणार सुधारित वैद्यकीय सुविधा
एनटीपीसीकडून एन. एम. वाडिया रुग्णालयाच्या पायाभूत सुविधांना बळ; ₹7.64 कोटींच्या CSR प्रकल्पाला मंजुरी
आयपीडी ब्लॉक A, B व अनेक्स इमारतींचे नूतनीकरण; सोलापूरसह ग्रामीण भागातील रुग्णांना मिळणार सुधारित वैद्यकीय सुविधा
सोलापूर (प्रतिनिधी):- सार्वजनिक आरोग्य सुविधांना बळकटी देण्याच्या उद्देशाने एनटीपीसी पश्चिम विभाग–१ (WR-I) मुख्यालयाने कॉर्पोरेट सोशल रिस्पॉन्सिबिलिटी (CSR) उपक्रमांतर्गत सोलापूर येथील एन. एम. वाडिया रुग्णालयातील आयपीडी ब्लॉक A, B आणि अनेक्स इमारतीच्या पुनर्बांधणी, दुरुस्ती व नूतनीकरणासाठी महत्त्वाचा प्रकल्प हाती घेतला आहे. या प्रकल्पासाठी सुमारे ₹7.64 कोटींचा निधी मंजूर करण्यात आला आहे.
या उपक्रमामुळे रुग्णालयातील आरोग्य पायाभूत सुविधा अधिक आधुनिक होणार असून सोलापूर शहरासह आसपासच्या ग्रामीण भागातील नागरिकांना अधिक दर्जेदार वैद्यकीय सेवा उपलब्ध होण्यास मदत होणार आहे.
या प्रकल्पाच्या औपचारिक प्रारंभासाठी २९ जुलै २०२४ रोजी एनटीपीसी पश्चिम विभाग-१ मुख्यालय आणि एन. एम. वाडिया रुग्णालय यांच्यात सामंजस्य करार (MoA) करण्यात आला. या करारानुसार रुग्णालयातील आयपीडी ब्लॉक्सचे व्यापक नागरी दुरुस्ती व नूतनीकरण करण्यात येणार आहे.
प्रकल्पांतर्गत इमारतींची संरचनात्मक दुरुस्ती, विद्युत कामे, आधुनिक स्ट्रेचर लिफ्टची स्थापना, तसेच आवश्यक पायाभूत सुविधा उभारण्यात येणार आहेत. याशिवाय सल्लागार सेवा व वैधानिक तरतुदींचाही समावेश करण्यात आला आहे. या सर्व कामांमुळे बिल्डिंग A, बिल्डिंग B आणि अनेक्स बिल्डिंगमधील इनपेशंट सुविधा अधिक सक्षम आणि आधुनिक होणार आहेत.
या प्रकल्पाबाबत बोलताना एनटीपीसी पश्चिम विभाग-१ चे प्रादेशिक कार्यकारी संचालक ई. सत्य फणी कुमार म्हणाले की, “आरोग्यसेवा ही समाजविकासाची अत्यंत महत्त्वाची बाब आहे. CSR उपक्रमांतर्गत एन. एम. वाडिया रुग्णालयातील आरोग्य पायाभूत सुविधा मजबूत करून सोलापूर आणि आसपासच्या नागरिकांना अधिक दर्जेदार उपचार सुविधा देण्याचा आमचा प्रयत्न आहे.”
एनटीपीसी सोलापूरचे प्रकल्प प्रमुख बी. जे. सी. सास्त्री यांनी सांगितले की, “हा उपक्रम प्रकल्प परिसरातील समुदायांच्या कल्याणासाठी एनटीपीसीची असलेली बांधिलकी दर्शवतो. आयपीडी ब्लॉक्सचे नूतनीकरण झाल्यामुळे रुग्णालयातील सेवा अधिक सक्षम होतील आणि उपचारांची गुणवत्ता वाढेल. विशेषतः एनटीपीसी प्रकल्प परिसरातील ग्रामीण भागातील नागरिकांना याचा मोठा फायदा होणार आहे.”
पश्चिम विभागाच्या प्रादेशिक मानव संसाधन प्रमुख वंदना चतुर्वेदी यांनी सांगितले की, एनटीपीसीचे CSR उपक्रम समाजात दीर्घकालीन सकारात्मक बदल घडवून आणण्याच्या उद्देशाने राबवले जातात. आरोग्य संस्थांना बळकटी देणे हे समाजाच्या जीवनमानात सुधारणा घडविण्याच्या दिशेने महत्त्वाचे पाऊल असल्याचे त्यांनी नमूद केले.
दरम्यान, एनटीपीसी सोलापूर प्रकल्प परिसरातील अनेक गावांतील नागरिकांनी या उपक्रमाचे स्वागत केले आहे. विशेष उपचारांसाठी सोलापूर शहरावर अवलंबून असलेल्या ग्रामीण नागरिकांना रुग्णालयातील सुधारित सुविधा, अधिक चांगली रुग्णसेवा आणि आपत्कालीन परिस्थितीत जलद उपचार मिळण्यास मदत होईल, अशी अपेक्षा व्यक्त करण्यात येत आहे.
या CSR उपक्रमाद्वारे एनटीपीसी WR-I मुख्यालय सोलापूर व एनटीपीसी सोलापूर प्रकल्प परिसरातील ग्रामीण समुदायांच्या आरोग्य सुविधांना बळकटी देत समाजकल्याणासाठी सातत्याने योगदान देत आहे.
