सोलापूर पोलिसांचा अभिमान ! राजकुमार तोळनुरे यांना राष्ट्रपती पोलीस पदक जाहीर

३४ वर्षांची निष्कलंक सेवा, ५१२ बक्षिसे अन् राष्ट्रपती पदकाचा मान! पोलीस उपनिरीक्षक राजकुमार तोळनुरे यांचा गौरव

सोलापूर (प्रतिनिधी):- सोलापूर शहर पोलीस दलातील कर्तव्यनिष्ठ, धडाडीचे आणि तपासात कुशल अधिकारी म्हणून ओळख असलेले श्री. राजकुमार चनिवरप्पा तोळनुरे, पोलीस उपनिरीक्षक, शहर वाहतूक शाखा (दक्षिण), सोलापूर शहर यांना त्यांच्या दीर्घकाळच्या उत्कृष्ट आणि उल्लेखनीय सेवेसाठी २६ जानेवारी २०२६ रोजी राष्ट्रपती पोलीस पदक जाहीर झाले आहे. या सन्मानामुळे सोलापूर पोलीस दलासह त्यांच्या मूळ गावात व सर्व स्तरातून अभिनंदनाचा वर्षाव होत आहे.

दि. २५ ऑगस्ट १९९२ रोजी पोलीस दलात भरती झालेल्या मा. राजकुमार तोळनुरे यांनी आजवर ३४ वर्षांची प्रदीर्घ सेवा बजावली असून, या काळात त्यांनी विविध जबाबदाऱ्या अत्यंत प्रामाणिकपणे पार पाडल्या आहेत. त्यांच्या सेवाकाळात त्यांनी एकूण ५१२ बक्षिसे मिळवून पोलीस दलातील एक आदर्श अधिकारी म्हणून स्वतःची वेगळी ओळख निर्माण केली आहे.

त्यांच्या उल्लेखनीय कार्याची दखल घेत १ मे २०१८ रोजी उत्कृष्ट पोलीस सेवेबद्दल त्यांना पोलीस महासंचालक (DG Insignia) चिन्हाने सन्मानित करण्यात आले होते. त्यानंतर आता राष्ट्रपती पोलीस पदकाने त्यांच्या कार्यावर शिक्कामोर्तब झाले आहे.

*विविध पोलीस ठाण्यांत प्रभावी सेवा*

मा. तोळनुरे यांनी पोलीस मुख्यालय, जेलरोड पोलीस ठाणे, सदरबझार पोलीस ठाणे, गुन्हेशाखा, फौजदारचावडी पोलीस ठाणे, विजापूर नाका पोलीस ठाणे तसेच शहर वाहतूक शाखा (दक्षिण विभाग) येथे कर्तव्य बजावले आहे. प्रत्येक ठिकाणी त्यांनी गुन्हे उघडकीस आणण्यात उल्लेखनीय कामगिरी केली आहे.

*गाजलेली प्रकरणे*

विजापूर नाका पोलीस ठाण्याच्या गु.र.नं. 34/2019 भादंवि 380, 34 या प्रकरणात सोरेगाव येथील गजानन महाराज मंदिरातील चांदीच्या पादुका, छत्री व देणगीपेटीतील सुमारे २ लाख ८० हजार रुपयांच्या चोरीचा गुन्हा कोणताही ठोस पुरावा नसताना अत्यंत कौशल्याने तपास करून आंतरराज्य टोळीचा पर्दाफाश करत आरोपींना अटक करण्यात आली.

फौजदारचावडी पोलीस ठाण्याच्या गु.र.नं. 737/2016 भादंवि 392, 34 या प्रकरणात गेल्या चार वर्षांपासून जबरी चोरी करून पोलिसांना गुंगारा देणाऱ्या बाप-लेक आरोपींना अहमदनगर येथून अटक करून त्यांच्याकडून ६५ तोळे सोने जप्त करण्यात आले. या तपासातून सोलापूर शहरातील २५ गुन्हे उघडकीस आले.

जेलरोड पोलीस ठाण्याच्या गु.र.नं. 1/2000 भादंवि 376, 377, 201, 363, 341, 302 या अतिशय संवेदनशील प्रकरणात पाच वर्षांच्या अल्पवयीन मुलीवरील अत्याचार व खून प्रकरणाचा छडा लावून आरोपीस अटक करण्यात त्यांनी मोलाची भूमिका बजावली.

सदरबझार पोलीस ठाण्याच्या गु.र.नं. 3373/2002 आर्म अ‍ॅक्ट अंतर्गत कर्नाटकातील आंतरराज्य गुन्हेगारी टोळीचा पर्दाफाश करत खून, दरोडा, खंडणी व अवैध शस्त्र विक्रीसंबंधी ७ गंभीर गुन्हे उघडकीस आणले.

फौजदारचावडी पोलीस ठाण्याच्या गु.र.नं. 261/2014 भादंवि 379 प्रकरणात हैद्राबादहून परतताना ट्रकमधील १४ लाख ८६ हजार रुपयांच्या चोरीचा गुन्हा अवघ्या ४८ तासांत उघडकीस आणून मुद्देमाल जप्त करण्यात आला.

*पोलीस दलाचा अभिमान*

कर्तव्यनिष्ठा, प्रामाणिकपणा, तपासातील बारकाई आणि नागरिकांप्रती असलेली संवेदनशीलता यामुळे मा. राजकुमार तोळनुरे हे पोलीस दलातील अनेक तरुण अधिकाऱ्यांसाठी प्रेरणास्थान ठरले आहेत. राष्ट्रपती पोलीस पदकाच्या सन्मानामुळे सोलापूर पोलीस दलाचा गौरव अधिक उंचावला असून, त्यांच्या पुढील सेवेसाठी सर्व स्तरातून शुभेच्छा व्यक्त केल्या जात आहेत.