उळेच्या आरोग्य मंदिराने गाठला गुणवत्तेचा ९० टक्क्यांचा टप्पा; NQAS मानांकनाने राष्ट्रीय पातळीवर गौरव

उळेच्या आरोग्य मंदिराने गाठला गुणवत्तेचा ९० टक्क्यांचा टप्पा; NQAS मानांकनाने राष्ट्रीय पातळीवर गौरव

बोरामणी प्राथमिक आरोग्य केंद्रांतर्गत आयुष्यमान आरोग्य मंदिराची उल्लेखनीय कामगिरी; जिल्ह्यात आतापर्यंत ३९ आरोग्य मंदिरांना मानांकन

सोलापूर : ग्रामीण भागातील नागरिकांना उपलब्ध करून दिल्या जाणाऱ्या आरोग्यसेवेची गुणवत्ता आता राष्ट्रीय पातळीवरही अधोरेखित झाली आहे. दक्षिण सोलापूर तालुक्यातील उळे येथील आयुष्यमान आरोग्य मंदिराने राष्ट्रीय गुणवत्ता आश्वासन मानांकन (NQAS) प्रक्रियेत तब्बल ९० टक्के गुण मिळवत मानांकन प्राप्त केले आहे. बोरामणी प्राथमिक आरोग्य केंद्रांतर्गत कार्यरत असलेल्या या आरोग्य मंदिराची ही कामगिरी स्थानिक आरोग्य यंत्रणेसाठी महत्त्वपूर्ण मानली जात आहे.

जिल्हा परिषदेचे मुख्य कार्यकारी अधिकारी कुशल जैन, जिल्हा आरोग्य अधिकारी डॉ. सतीश कोपुरवाड आणि अतिरिक्त जिल्हा आरोग्य अधिकारी डॉ. नंदकिशोर घाडगे यांच्या मार्गदर्शनाखाली जिल्ह्यातील आरोग्य संस्थांमध्ये गुणवत्ता सुधारण्यावर सातत्याने भर दिला जात आहे. याच प्रयत्नांचा एक भाग म्हणून उळे येथील आरोग्य मंदिराने NQASच्या विविध निकषांची प्रभावी पूर्तता केली.

राष्ट्रीय आरोग्य अभियानांतर्गत आरोग्य संस्थांच्या गुणवत्तेचे विविध पातळ्यांवर मूल्यांकन केले जाते. आरोग्यसेवेची गुणवत्ता, रुग्णकेंद्रित सेवा, रुग्णांची सुरक्षितता, स्वच्छता, उपलब्ध सुविधा, व्यवस्थापन, सेवा वितरण, औषधांचा साठा व व्यवस्थापन, वैद्यकीय उपकरणांची उपलब्धता आणि देखभाल, नोंदवही तसेच आरोग्यविषयक जनजागृती अशा विविध बाबींची पाहणी या प्रक्रियेत केली जाते.

या सर्व बाबींच्या मूल्यांकनामध्ये उळे आयुष्यमान आरोग्य मंदिराने ९० टक्के गुण मिळविले. त्यामुळे या आरोग्य केंद्रातील सेवा व व्यवस्थापनाची राष्ट्रीय गुणवत्ता निकषांनुसार नोंद झाली आहे.

NQAS मानांकनामुळे आरोग्य संस्थेतील सेवा अधिक गुणवत्तापूर्ण करण्यासाठी निश्चित मानके आणि कार्यपद्धतींचे पालन करण्यास चालना मिळते. औषध व वैद्यकीय उपकरणांचे व्यवस्थापन, रुग्ण सुरक्षा, स्वच्छता, आवश्यक नोंदींची पूर्तता तसेच रुग्णांच्या समाधानाच्या दृष्टीने सातत्याने सुधारणा करण्यास या प्रक्रियेचा उपयोग होतो.

उळे आणि परिसरातील नागरिकांसाठी त्यांच्या जवळच्या आरोग्य केंद्रात अधिक सुरक्षित, शिस्तबद्ध आणि रुग्णकेंद्रित सेवा उपलब्ध करून देण्याच्या दृष्टीने हे मानांकन महत्त्वाचे ठरले आहे.

उळे आयुष्यमान आरोग्य मंदिराला हे मानांकन मिळवून देण्यासाठी स्थानिक आरोग्य पथकाने विशेष मेहनत घेतली. समुदाय आरोग्य अधिकारी डॉ. मंजुषा देशमुख, आरोग्य सेविका कल्पना सावंत, आरोग्य सेवक शुभेंद्र काळे, आशा स्वयंसेविका सत्यभामा साठे, शीतल माळी, फरहाना शेख तसेच अर्धवेळ परिचर माधुरी शिंदे यांनी आरोग्य केंद्रातील विविध कामकाजामध्ये सातत्याने योगदान दिले.

दैनंदिन रुग्णसेवेबरोबरच स्वच्छता, नोंदवही, औषध व्यवस्थापन, रुग्ण सुरक्षा आणि मानांकनासाठी आवश्यक असलेल्या विविध बाबींची पूर्तता करण्यासाठी पथकाने केलेल्या प्रयत्नांचे फलित म्हणून ही कामगिरी समोर आली आहे.

सोलापूर जिल्ह्यातील सर्व पात्र आरोग्य संस्थांनी राष्ट्रीय गुणवत्ता मानांकनाच्या निकषांची पूर्तता करावी, यासाठी आरोग्य विभागाच्या माध्यमातून प्रयत्न सुरू आहेत. आतापर्यंत जिल्ह्यातील ३९ आयुष्यमान आरोग्य मंदिरांना NQAS मानांकन प्राप्त झाले आहे.

उर्वरित आरोग्य संस्थांचेही इन्स्पेक्शन आणि गुणवत्ता मूल्यांकनाची प्रक्रिया सुरू असल्याची माहिती मुख्य कार्यकारी अधिकारी कुशल जैन यांनी दिली. त्यामुळे जिल्ह्यातील आणखी आरोग्य संस्थांना राष्ट्रीय गुणवत्ता मानांकन मिळण्याची प्रक्रिया पुढे सुरू आहे.

उळे आयुष्यमान आरोग्य मंदिराने ९० टक्के गुणांसह मिळविलेले हे मानांकन ग्रामीण आरोग्य व्यवस्थेतील गुणवत्ता सुधारण्याच्या प्रयत्नांना अधोरेखित करणारे ठरले आहे.